Ekainaren 4an izanen da.
HISTORIA zein bestelako ISTORIOAK auzokideengana hurbiltzeko HORMARIK GABEKO IKASGELA
2016(e)ko martxoaren 31(a), osteguna
2016(e)ko martxoaren 23(a), asteazkena
2016(e)ko martxoaren 21(a), astelehena
2016(e)ko martxoaren 20(a), igandea
Juan Martin Guevara, "Che" Guevararen anaia
«Niretzat Che ez da mito bat, anaia baizik»
Marisol Ramirez / Argazki Press |
EITBk gonbidatuta, Euskal Herrian izan da egunotan Juan Martin Guevara (Cordoba, Argentina, 1943). Ezkerreko militantea da, FAS Sozialismoaren aldeko eta Inperialismoaren kontrako Fronteko kide izan zen, eta preso atxiki zuten 1975etik 1983ra, baina, batez ere, Ernesto Guevara Che-ren anaia izateagatik egin da ezagun.
Zuen familian bazenekiten jatorria Euskal Herrian zenutela. Zein irudi zenuten Euskal Herriaz?
Bai, bagenekien gure jatorrian euskal osagarri garrantzitsu bat zegoela, gure arbasoak Euskal Herritik iritsi zirela; Txilera lehen, eta gero, handik Argentinara. Baina, horretaz aparte, ez genuen erreferentzia handirik. Gure izeba Beatrizek beti esaten zuen Euskal Herriko eta Irlandako jatorria genuela, eta familiaren izaeran nabaritzen zela hori: burugogorrak gara, erabakimen handikoak eta managaitzak. Baina hori baino askoz gehiago ez; gu aurrera begira bizi ginen, eta ez genuen gure arbasoen berri jakiteko irrika berezirik.
Nolakoa zen Ernesto Guevara?
Familian matxinoak izan gara beti, baina Ernesto, inor baino gehiago. Eta bidaietara oso emana: beti zegoen kanpoan, bizikletan, motorrean, auto-stop eginez eta abar; eta onena zen beti itzultzen zela. Medikuntza ikasketak ere horrela egin zituen, bere kasa; normalean ez zen fakultatera joaten; itzultzen zenean, ikasi, eta azterketetara aurkezten zen. Eta nahikoa zen erronka jotzea eta esatea: «Ezetz egin hau edo bestea», berak egin zezan. Esan didatenez, ezaugarri hori oso euskalduna da.
Jakitun zen iraultzaren ikur gisa hartzen ari zen neurriaz?
Nik esango nuke baietz, bere lidergoaren garrantziaz kontziente zela, nahiz eta Fidel Castrok inoiz kritikatu dion ez zuela iraultzan zuen garrantzia balioetsi eta arrisku gehiegi hartu zituela. Baina niretzat Che ez da mito bat; nik anaia nuen. Iraultza gailendu zenean, [1959ko urtarrilean] ni Kubara joan nintzen, eta han mundu guztiak komandantearekin egon nahi zuen; nik ez, nik anaiarekin egon nahi nuen. Gure belaunaldikoentzat ikur izan zen Che, eta ez soilki ezkerrarentzat, gazte guztientzat baizik.
Zu ere errepresioa nozitutakoa zara.
1974an espetxeratu ninduten lehenengo aldiz, [Juan Domingo] Peron erbestetik itzuli zenean. Orduan hasi zen ezkerraren kontrako errepresioa. Jomuga ez zen ezker osoa, ezker iraultzailea baizik, boterea eskuratzeko estrategia argia zuena. Bolada laburra eman nuen espetxean, baina, jakina, ordurako markatutanengoen, eta 1975ean berriro atxilotu ninduten. 1975etik 1983ra kartzelan egon nintzen. Jakina, militarrak boterera iristeak ez zuen asko lagundu presoon egoera samurtzen.
* Artikulu osoa:
2016(e)ko martxoaren 17(a), osteguna
1516-martxoa-17: Nafarroa askatzeko saiakera
Irudia: Martintxo |
Bestelako
historiografia ofizial horiek ukatu egiten dute inbasioa bortzaz egin
zenik eta bertakoen menpekotasuna bilatzen zuenik, nahiz eta garaiko
protagonistek terminologia hori erabili zuten behin eta berriro;
Aragoiko Fernando Katolikoak batetik eta Nafarroako errege-erregina Joan eta Katalinak bestetik.
Bortxaz
lapurtutako subiranotasunik ez bada, are gutxiago subiranotasun hori
berreskuratzeko izandako saiakerarik, jakina. Eta, hori ukatzerik ez
balego, egun gertatzen ari dena Nafarroako historiografia berriak
egindako lan itzelari esker, hobe alde batera uztea; izan ere, handia
da ustezko berdinen arteko itunaren mitoa ezabatzeko arriskua.
Prozesu
historiko hura, hala ere, izan zen, gaur bezalako egun batean,
martxoaren 17an, duela 500 urte dagoeneko. 1516an hil zen Fernando
Katolikoa eta berriro ere Erresuma berreskuratzeko saiakaera egin
zen. Nafarroako Pedro mariskalak, konkistaren aurkako
erresistentziaren pertsonaiarik garrantzitsuenak, Pirinioak zeharkatu
zituen Erronkarin barna. Horrekin batera, altxamenduak izan ziren
Zangotzan, Erriberrin eta Erresumako beste hainbat tokitan. Saiakera
hartan beaumondarrak ere tartean ibili ziren, Leringo kondea barne.
Mariskala eta bere gudariak berandu iritsi ziren eta kanpoko
laguntzarik gabe aritu behar izan zuten, 1512ko udazkeneko lehenengo
saiakeran ez bezala.
Soldadu
okupatzaileen buruzagi gisa Villalba koronelak jardun zuen.
Herritarren askatasun egarriak bultzatuta, armada askatzailea
bazetorrelako berria lau haizetara zabaldu zen. Leringo kondeari
Iruñearen kontrola kendu zioten, ez baitziren harekin ere fio, eta
espainiarrak hirian gotortu ziren.
Pedro
mariskalak Pirinioak zeharkatu orduko, Burgi inguruan, Erronkarin,
inguratu eta beste hainbat ofizialekin batera atxilotu egin zuten.
Mariskala Gaztelara eraman zuten eta baita askatasuna eta
pribilegioak eskaini ere errege espainiarrari fideltasuna agintzen
bazion; aukera horri uko egin zion, ordea, eta urte batzuk geroago
Simancaseko gazteluan hil zen, edo hil egin zuten.
Nafarroan,
zenbat gelatan azaldu dira gertaera horiek? Zein ikaslek ezagutzen
dituzte pertsonaia historiko horiek? Noiz arte izanen dugu Nafarroa
ikasgelatik at?
2016(e)ko martxoaren 13(a), igandea
Euskal "Spotlight": Irungo La Salleko anaia Valero
Spotlight filmearekin agurtu dugu larunbata, zinez oso lan bikaina. Boston Globe kazetak ikerketa zabala abiatu zuen apaizek eragindako abusu eta bortxaketen inguruan 90eko hamarkadaren hasieran. Spotlight izeneko ikerkea taldeak aurrera eraman zuen lan horri esker frogatuta geratu zen Eliza katolikoak isildu zituela, hainbat hamarkadaz, Bostongo abusu horiek guztiak, eta erasotzaileak lagundu eta babestu zituela.
Martxoaren 1ean, Alberto Barandiaranek kronika bat idatzi zuen Berrian, non baieztatzen zuen kazetaritzak baduela injustiziak salatzeko gaitasuna eta, batez ere, eginbeharra... gaur, hemen. Aurretik, kontatu zigun gaztetan Irungo La Salle eskolan pairatu zituzten abusuak.
Gazte
ginenean, guk abusuak jasan genituen Irungo La Salle eskolan. Anaia
Valeriok, gure tutoreak, asteko azken ordua aprobetxatzen zuen gure
aurrean jarri eta patxadaz hitz egiteko, giro lasaian. Esertzen zen
bere mahaiaren aurrealdean, edo ikasmahaien lehen lerroko eserlekuan,
guri begira, eta gogoetan hasten zen, lagun artean bezala. Han esaten
zirenak ezin zirela gelatik atera behar azpimarratzen zuen maiz. Hori
zela gure konfiantzazko eremua. Inork gelatik kanpo zerbait esanez
gero, traizioa egingo ziola taldeari. Horrela bakarrik lortuko
genuela elkarri gure gauzak aitortzea. Ona zela hori.
Behin
esan zigun ezagutzen zituela gu bezalako gazteak elkarri zakila
ukitzen ziotenak, «konfiantza edo adiskidetasuna» erakustearren. Ez
zuela ezagutzen adiskidetasun aitorpen benetakoagorik elkarri
masturbatzea baino.
Hamahiru
urte genituen.
Tutoretzak
genituenean, ikasmahaien gainean eserarazten gintuen, hankak aulkian
jarrita, aurrez aurre. Gure belaun gainean paratzen zituen eskuak,
eta besarkada estuak ematen zizkigun. Eskua jertsearen azpitik
luzatzen zuen. Izaera koleriko samarra zeukan, haserretzen zen
urruntzen baginen. Gaizki pentsatu izanaren errua txertatzen zigun.
Konfiantza, hori zen bere hitz klabea.
Garai
hartan, eskolan asko lantzen zituzten adiskidantzazko egonaldiak,
gogo jardunak edo. Borondatezkoak ziren, eta Valeriok lortu zuen gure
lagun taldea konbentzitzea. Donostiako Antigua auzoko etxe batera
joan ginen beraz sei lagunak, han asteburua pasatzera. Uda zen,
estropadak ikusi genituelako. Kasualitatez, guretako omen ziren hiru
logelatako bat txikiegia zen, eta, oheratzeko unea iritsi zenean,
Valeriok esan zigun bere logelan bazegoela tokia, gutako bat
berarekin joateko. Ez dakit nola, baina txandak azkar osatu ziren,
eta ni geratu nintzen tokirik gabe. Ezetz, tematu nintzaion
Valeriori, koltxoi bat jarriko genuela lurrean, eta moldatuko
nintzela Iñakirekin. Ez zitzaion gustatu. Muturtuta egon zen
hurrengo egun osoan. Konfiantzarik ez zegoela eta, kexaka aritu zen.
Etxerako trena hartu genuenean, lasaitu ederra hartu genuen denok.
Esango
nuke inoiz ez dela hemen benetan hitz egin, benetan aztertu,
Elizarekin lotutako irakaskuntzaren inguruan hainbeste urtez
gertatutakoa. Nola toleratu den hori guztia. Nola isildu den. Ez dugu
galdetu, ez dugu entzun, ez dugu kontatu. Eta hemen, guk, badugu
Pullitzer bat.
Ez
baitzen bakarrik anaia Valerio izan, eta ez ziren bakarrik grina
sexualarekin lotutako abusuak izan. Eskola berean eta garai berean,
irakasle batek nerbioak galdu zituen batean Pedro Pablori esan zion
leihotik bere burua botatzeko: «Pedro
Pablo, hala, tírate por la ventana si te da la gana».
Eta Pedro Pablok bere burua leihotik behera bota zuen.
Ez
genuen negar egiten. Ez ginen kexu. Irunen, 70eko hamarkadan.
Anaia
Valerio ikastetxez aldatu zuten tutoretza horietakoren batean eskua
gehiegi luzatu zuela eta gurasoek protesta egin zutenean. Ikastetxez
aldatu zuten.
2016(e)ko martxoaren 8(a), asteartea
Martxoak 8... Rosa Luxenburg-ekin
"Askatasuna pribilegio bihurtzen den unetik eraginkor izateari uzten dio".
Rosa Luxemburg
Rosa Luxemburg
Elkarlanean biografiak, 2000. urtea. |
Martxoak 8, Nazioarteko Emakume Langileen Eguna. Egun egokia honako proposamen hau luzatzeko: Lorea Agirrek idatzitako Rosa Luxemburg-en biografia. Liburu laburra, irakurterraza eta euskaraz, ezin da gehiago eskatu, ezta? Hortik atera dut arestian idatzitako aipua. Rosa Luxemburg, emakumea eta iraultzailea. Animatu eta irakurri langile mugimenduan ezinbesteko ekarpena egin zuen emakume honen biografia laburra. Izan ere, mundu berdinzaleago, zuzenago bat helburu duen ezker mugimendua inoiz ez baita benetan iraultzaile izango sexu bietako pertsonen aukera eta eskubide berdintasuna praktikan gauzatzea lortzen ez badu.
2016(e)ko martxoaren 7(a), astelehena
"Difret" filma: Etiopiako emakumeen adorea
Gaurko tutoretza-saioan Difret filma ikusten bukatu dugu. 2014an Zeresenay Berhane Mehari zuzendariak eginiko filmak hainbat sari irabazi ditu, Berlinen eta Sundance zinema-jaialdian, besteak beste.
Addis Abeban (Etiopia), Meaza Ashenafi abokatuak legelari baten babesa behar duten emakumeei eta haurrei laguntzeko sare bat sortu du. Poliziaren eta gobernuaren etengabeko xaxatzeari aurre egin beharko dio. Hala ere, Hirut 14 urteko neskatoa defendatzera ausartuko da. Hirut, ikastetxetik itzultzen ari zela, bahitu eta bortxatu egin zuten, baina berak bahitzaile bat hil eta ihes egitea lortu zuen. Bere buruaren defentsan egin zuen arren, heriotza-zigorra jasotzeko arriskuan dago Hirut.
Gizarte patriarkala, emakumeen eskubideak, tradizioaren xama, boterea, justizia... aztergai izango ditugu hurrengo saioan, solasaldi emankorra izango dugu, seguru.
2016(e)ko martxoaren 3(a), osteguna
40 urte ahanzturaren aurka: 1976eko martxoaren 3a
1976ko martxoaren 3an, lan baldintza duinen alde greban ziren ehunka langile bilduta zeuden Gasteizko San Frantzisko elizan, eta handik irtetean tiroz sakabanatu zituen Poliziak. Guztira, bost lagun hil zituzten eta ehunka zauritu. Josu Ormaetxea, Norberto Mujika eta Nerea Martinez Martxoak 3 Biktimen elkarteko kideen testigantzak jaso ditu Berria TBk.
[Iraupena: 6:45 minutu]
2016(e)ko martxoaren 2(a), asteazkena
Iñigo Aritza ikastolan, Arrano beltza lagun
Argazkia: Patxi Abasolo |
Ondoko argazkian ikus dezakegu ikasleek gainbegiratzeko eraman ditudan komiki eta liburu batzuk eta, jarraian, Arze-ren olerkiaz Negu Gorriak egindako abestia. On degizuela!
Arrano beltza
1200, 1332, 1379
1512
1609, 1789, 1798
1839, 1878
1931, 1937, 1966, 1971...
Harpidetu honetara:
Mezuak (Atom)
-
Jakinarazi digute badugula teknikari berria , Iñaki ordezkatu duena. Mendillorriko BHIko bi eraikinetan ez ezik, beste lau ikastetxeetan er...
-
2014an Berria n argitaratu zen Edu Lartzangurenek Extefana Irastorza poetari egindako elkarrizketa. Bertan Extefanak kontatzen digu be...
-
Tasio margolariak Nazioarteko Harremanetan murgildu gaitu gaurko komiki-tiran. Tasio , Gara , 2017-08-27