Kalean dugu gure Txarliren beste lan erraldoi bat, El arte gótico en Navarra. Ez dakit azaldu behar den Txarli nor den; tira, bada!, badaezpada. Carlos J. Martínez Álava historialari, doktore eta, hau garrantzitsuena, Mendillorriko Bigarren Hezkuntzako Institutuko irakaslea. Aurretik honako argitalpen hauek gauzatu zituen: "Del románico al gótico en la arquitectura de Navarra", hainbat monografia, "El Arte Románico en Navarra", eta parte hartu du "Enciclopedia del Románico en Navarra" zein "Enciclopedia del Románico en Zaragoza" proiektuetan. Urtero gidatzen ditu, departamentuko beste irakasleekin batera, Iruñeko Katedralerako bisitak, ikastetxeko DBHko ikasleei zuzenduak, hori luxua!
Clara Fernández-Ladredak zuzendu du lan mardul hau, eta Txarli-rekin batera Javier Martínez de Aguirrek eta Mari Carmen Lacarra Ducayk hartu dute parte. 669 orrialde, 1.000 ale, eta 38 euro. Nafarroako gotikoa gustuko izanez gero, hona hemen dirua fundamentuz gastatzeko aukera polita.
Liburuak lau ataletan dago egituratuta:
- Gotiko klasikoa (1200-1276).
- Gotiko distiratsua (1276-1387)
- Nazioarteko estiloa eta Borgoinako eragina (1387-1441).
- Gotiko berantiarra (1441-1512).
1512an agur nafar gotikoari, agur gotikoari eta agur Nafarroari. Gaztelak bideratutako konkistak eta horrekin abiatutako akulturazio prozesu latzak Nafarroa subjektu politikoa ez izatera eraman[go] dute. Hobeto galdera ikurra jartzen badugu, ezta? Badaezpada.
* Informazio gehiago:
iruzkinik ez:
Argitaratu iruzkina